حلاق رجالي - خدمة منازل

Mubarak Esmail · 29-06-2010, 10:30 AM

حلاق رجالي - خدمة منازل

المشروع : حلاق رجالي

شوفلك حلاق خبره سنتين و اتفق معاه أنك تستلم المكالمات و تطرشه حق الزباين وشرط السيارة عليه
و أخذ على الراس 6 دك و اللحية 2 دك أو حط الأسعار اللي تبيها يعني حتى لو أغلى من السوق عادي لأنك قاعد تخدم العميل في بيته

واتفق مع الحلاق أن ياخذ 60% من الدخل ولك كصاحب المشروع 40%
اهو ياخذ 60% لان عليه السيارة والعده وكل شي مسكين فلازم تغريه بالشغل وتعطيه فوق الـ 50%

وانت كصاحب مشروع كل اللي عليك انت تستلم المكالمات وتدز الحلاق حق الزباين

تفاصيل الدخل المتوقع في بداية المشروع:
إذا باليوم يخدم 3 أشخاص وكل واحد يدفع 6 دك حق حلاقه الشعر :
3 * 6 = 18 دك باليوم
18 * 30 = 540 دك بالشهر
نسبه الحلاق 60% = 324 دك
نسبة صاحب المشروع 40% = 216

هذا اذا فرضنا انك خدمت 3 اشخاص باليوم يطلبون حلاقه الشعر .. هذا غير اللحية اللي عليها إقبال أكثر
وهذا اذا كان عندك حلاق واحد فقط في البدايه .. طبعا بعدين ممكن تزيد الحلاقين وكل واحد تربح منه 216 دك

مصاريف المشروع:
كل شهر تحط إعلان يكلفك 50 دك بالوسيط راح يفي بالغرض ، بس الاعلانات اهي مصاريف المشروع لان كل المصاريف الباجية من ادوات و توصيل على الحلاق نفسه ، والرخصة تطلعها بـ 300 دك تقريبا اذا الواحد يبي يشتغل رسمي

مميزات المشروع :
1- خدمة منازل
2- صاحب المشروع ما يتعب وماكو أي ضغط عليه بس يدير ويتابع المشروع المشروع واذا طلع ارباح معقوله ممكن يخلي موظف ثاني يستلم المكالمات

عيوب المشروع :
عيب واحد فقط .. يبيلك واحد أمين ويخاف الله عشان ما ياخذ من الزبون 12 دك ويقولك انه ماخذ 6 دك

يالله اللي يطبق هالمشروع خل يعطيني خبر لاني ماحب اروح الحلاق وأصف بالطابور لول
المصدر: أصحاب الأفكار | Ideas Owners

Yazan · 30-06-2010, 06:52 PM

المشكلة ان الحلاق راح يبوق الفكرة ويسويها بروحه

محمـد · 30-06-2010, 08:50 PM

السلام عليكم ورحمة الله وبركاتـه

ماراح تحصل أحد يحلق بالبيت هالأيام ،،،

واذا تبي أحد يحلق تحتــاج لدعايـه كبيره جدا ،،،

وأشووف هالمشروع من وجهة نظري "ماله داعي"

تحياتي

twix_mix2 · 01-07-2010, 03:58 AM

احد المشاكل انا بعد شهر الحلاق راح يشتغل بروحه ويسكب فيك اشكره
فلازم تلقالك حل حق هالشي
يا اما يكون على كفالتك بجذيه راح تمسكه او انا صج يكون امين و مخلص و هالشي صعب تحصله هالايام

Mubarak Esmail · 01-07-2010, 09:44 AM

Yazan:
مثل ما قال twix_mix2 لازم يكون على كفالتك عشان مايلعب

محمد:
بالعكس من له خلق يصف بالدور عشان يحلق ؟ هالمشروع يضرب قبل العيد شوف شلون يصير طق عليه لول

twix_mix2:
كل الاتصالات بين الزباين و صاحب المشروع عشان اذا قرر الحلاق ان يطلع مايكون عنده أرقام الزباين ويشتغل معاهم بروحه

Mona AL-D · 16-07-2010, 04:07 AM

لووول
مو جنه قاعدين تقلدون الحريم ;d

tareq · 16-07-2010, 04:31 PM

لوووووووووووول بس الفرق أنه عندنا أحنا الحلاق يطول 10 دقايق و عندكم يا الحريم 10 ساعات

**fahad** · 17-07-2010, 04:17 AM

فكره حلوه بس ترا موجوده بس حق كبار شخصيات الي يطبقونه يتفق مع حلاق من صالونات ويودنه بالبيت بس طبعا يعطونه اسعار حلوه يعني بخشيش بس امانه فكره حلوه ولو تحط حق أطفال افضل وافضل يمكن يكود عليها طلب بتجربه يعني تحط اعلانات وتشوف في احد يبي يحلق بالبيت وحكم وبعدين طبق وتحياتي لكم

Mubarak Esmail · 17-07-2010, 04:03 PM

تره الموضوع يسوه، انا أول زبون
اللي يفتح هالمشروع خل يعطيني خبر
^_^

أحمرجوري · 25-07-2010, 02:24 PM

حلو الواحد يشغل فكرة بافكار حلوة بس المشروع هذا راح يفشل لانة مافي رجل يقعد بالبيت الرجل يحاول يطلعلة 100 عذر علشان يطلع من البيت

اما اذا وحهت المشروع لخدمة كبار السن في المستشفيات او المريض العادي اوكي اهني اكولك يمكن ينجح لانة بالمستشفيات الي يحلق للمرضة الممرض او السستر صح ولما يكون انسان ذو خبرة راح يفضلونة احسن

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري

حلاق رجالي - خدمة منازل

أفكار لمشاريع تكلف من 1 دك إلى 1000 دك